अङ्गदजाम्बवत्संवादः

अथ श्रीमद्वाल्मीकीयरामायणे सुन्दरकाण्डे अङ्गदजाम्बवत्संवादः नाम षष्ठितमः सर्गः ॥५-६०॥

तस्य तद् वचनं श्रुत्वा वालिसूनुरभाषत । अश्विपुत्रौ महावेगौ बलवन्तौ प्लवंगमौ ॥५-६०-१॥

पितामहवरोत्सेकात् परमं दर्पमास्थितौ । अश्विनोर्माननार्थं हि सर्वलोकपितामहः ॥५-६०-२॥

सर्वावध्यत्वमतुलमनयोर्दत्तवान् पुरा । वरोत्सेकेन मत्तौ च प्रमथ्य महतीं चमूम् ॥५-६०-३॥

सुराणाममृतं वीरौ पीतवन्तौ महाबलौ । एतावेव हि संक्रुद्धौ सवाजिरथकुञ्जराम् ॥५-६०-४॥

लङ्कां नाशयितुं शक्तौ सर्वे तिष्ठन्तु वानराः । अहमेकोऽपि पर्याप्तः सराक्षसगणां पुरीम् ॥५-६०-५॥

तां लङ्कां तरसा हन्तुं रावणं च महाबलम् । किं पुनः सहितो वीरैर्बलवद्भिः कृतात्मभिः ॥५-६०-६॥

कृतास्त्रैः प्लवगैः शक्तैर्भवद्भिर्विजयैषिभिः । वायुसूनोर्बलेनैव दग्धा लङ्केति नः श्रुतम् ॥५-६०-७॥

दृष्टा देवी न चानीता इति तत्र निवेदितुम् । न युक्तमिव पश्यामि भवद्भिः ख्यातपौरुषैः ॥५-६०-८॥

नहि वः प्लवने कश्चिन्नापि कश्चित् पराक्रमे । तुल्यः सामरदैत्येषु लोकेषु हरिसत्तमाः ॥५-६०-९॥

जित्वा लङ्कां सरक्षौघां हत्वा तं रावणं रणे । सीतामादाय गच्छामः सिद्धार्था हृष्टमानसाः ॥५-६०-१०॥

तेष्वेवं हतवीरेषु राक्षसेषु हनूमता । किमन्यदत्र कर्तव्यं गृहीत्वा याम जानकीम् ॥५-६०-११॥

रामलक्ष्मणयोर्मध्ये न्यस्याम जनकात्मजाम् । किं व्यलीकैस्तु तान् सर्वान् वानरान् वानरर्षभान् ॥५-६०-१२॥

वयमेव हि गत्वा तान् हत्वा राक्षसपुङ्गवान् । राघवं द्रष्टुमर्हामः सुग्रीवं सहलक्ष्मणम् ॥५-६०-१३॥

तमेवं कृतसंकल्पं जाम्बवान् हरिसत्तमः । उवाच परमप्रीतो वाक्यमर्थवदर्थवित् ॥५-६०-१४॥

नैषा बुद्धिर्महाबुद्धे यद् ब्रवीषि महाकपे । विचेतुं वयमाज्ञप्ता दक्षिणां दिशमुत्तमाम् ॥५-६०-१५॥

नानेतुं कपिराजेन नैव रामेण धीमता । कथंचिन्निर्जितां सीतामस्माभिर्नाभिरोचयेत् ॥५-६०-१६॥

राघवो नृपशार्दूलः कुलं व्यपदिशन् स्वकम् । प्रतिज्ञाय स्वयं राजा सीताविजयमग्रतः ॥५-६०-१७॥

सर्वेषां कपिमुख्यानां कथं मिथ्या करिष्यति । विफलं कर्म च कृतं भवेत् तुष्टिर्न तस्य च ॥५-६०-१८॥

वृथा च दर्शितं वीर्यं भवेद् वानरपुङ्गवाः । तस्माद् गच्छाम वै सर्वे यत्र रामः सलक्ष्मणः । सुग्रीवश्च महातेजाः कार्यस्यास्य निवेदने ॥५-६०-१९॥

न तावदेषा मतिरक्षमा नो यथा भवान् पश्यति राजपुत्र । यथा तु रामस्य मतिर्निविष्टा तथा भवान् पश्यतु कार्यसिद्धिम् ॥५-६०-२०॥

इत्यार्षे श्रीमद्रामायणे वाल्मीकीये आदिकाव्ये सुन्दरकाण्डे अङ्गदजाम्बवत्संवादः नाम षष्ठितमः सर्गः ॥५-६०॥