श्रीकृष्ण अवतार प्रस्तावः

ॐ नमो नारायणाय

अथ श्रीमन्नारायणीयम्

सप्तत्रिंशम् दशकम्

श्रीकृष्ण अवतार प्रस्ताव:

सान्द्रानन्दतनो हरे ननु पुरा दैवासुरे सङ्गरे त्वत्कृत्ता अपि कर्मशेषवशतो ये ते न याता गतिम् । तेषां भूतलजन्मनां दितिभुवां भारेण दूरार्दिता भूमि: प्राप विरिञ्चमाश्रितपदं देवै: पुरैवागतै: ॥१॥

हा हा दुर्जनभूरिभारमथितां पाथोनिधौ पातुकाम् एतां पालय हन्त मे विवशतां सम्पृच्छ देवानिमान् । इत्यादिप्रचुरप्रलापविवशामालोक्य धाता महीं देवानां वदनानि वीक्ष्य परितो दध्यौ भवन्तं हरे ॥२॥

ऊचे चाम्बुजभूरमूनयि सुरा: सत्यं धरित्र्या वचो नन्वस्या भवतां च रक्षणविधौ दक्षो हि लक्ष्मीपति: । सर्वे शर्वपुरस्सरा वयमितो गत्वा पयोवारिधिं नत्वा तं स्तुमहे जवादिति ययु: साकं तवाकेतनम् ॥३॥

ते मुग्धानिलशालिदुग्धजलधेस्तीरं गता: सङ्गता यावत्त्वत्पदचिन्तनैकमनसस्तावत् स पाथोजभू: । त्वद्वाचं हृदये निशम्य सकलानानन्दयन्नूचिवान् आख्यात: परमात्मना स्वयमहं वाक्यं तदाकर्ण्यताम् ॥४॥

जाने दीनदशामहं दिविषदां भूमेश्च भीमैर्नृपै: तत्क्षेपाय भवामि यादवकुले सोऽहं समग्रात्मना । देवा वृष्णिकुले भवन्तु कलया देवाङ्गनाश्चावनौ मत्सेवार्थमिति त्वदीयवचनं पाथोजभूरूचिवान् ॥५॥

श्रुत्वा कर्णरसायनं तव वच: सर्वेषु निर्वापित: स्वान्तेष्वीश गतेषु तावककृपापीयूषतृप्तात्मसु । विख्याते मधुरापुरे किल भवत्सान्निध्यपुण्योत्तरे धन्यां देवकनन्दनामुदवहद्राजा स शूरात्मज: ॥६॥

उद्वाहावसितौ तदीयसहज: कंसोऽथ सम्मानयन् एतौ सूततया गत: पथि रथे व्योमोत्थया त्वद्गिरा । अस्यास्त्वामतिदुष्टमष्टमसुतो हन्तेति हन्तेरित: सन्त्रासात् स तु हन्तुमन्तिकगतां तन्वीं कृपाणीमधात् ॥७॥

गृह्णानश्चिकुरेषु तां खलमति: शौरेश्चिरं सान्त्वनै: नो मुञ्चन् पुनरात्मजार्पणगिरा प्रीतोऽथ यातो गृहान् । आद्यं त्वत्सहजं तथाऽर्पितमपि स्नेहेन नाहन्नसौ दुष्टानामपि देव पुष्टकरुणा दृष्टा हि धीरेकदा ॥८॥

तावत्त्वन्मनसैव नारदमुनि: प्रोचे स भोजेश्वरं यूयं नन्वसुरा: सुराश्च यदवो जानासि किं न प्रभो । मायावी स हरिर्भवद्वधकृते भावी सुरप्रार्थनात् इत्याकर्ण्य यदूनदूधुनदसौ शौरेश्च सूनूनहन् ॥९॥

प्राप्ते सप्तमगर्भतामहिपतौ त्वत्प्रेरणान्मायया नीते माधव रोहिणीं त्वमपि भो:सच्चित्सुखैकात्मक: । देवक्या जठरं विवेशिथ विभो संस्तूयमान: सुरै: स त्वं कृष्ण विधूय रोगपटलीं भक्तिं परां देहि मे ॥१०॥